Фросина Пармаковска за романот „Одбројување“ вчера вечер во Даут пашиниот амам ја прими наградата „Роман на годината“ за 2017-ма, која ја доделува Фондацијата за промоција и унапредување на културните вредности „Славко Јаневски“.

Според жирито, кое одлуката ја соопшти на 15 март, „Одбројување“ е ненаметливо раскажана потресна семејна драма од современото скопско секојдневие, приказна структурирана во три дела, каде неименуваната нараторка низ постојани флешбекови на внатрешен монолог ја открива својата незавидна положба – заглавена со својот бесправедно љубоморен, параноичен маж со очигледно душевно нарушување.

На прогласувањето минатиот месец Пармаковска и се заблагодари на фондацијата „Славко Јаневски“ што, како што рече, ја спасила оваа награда и ја продолжила 19-годишната традиција на нејзино организирање и доделување. Од 1999 до лани со непрекинат континуитет неа ја доделуваше згаснатиот „Утрински весник“.

„Одбројување“ е трет роман на младата писателка (Скопје, 1985) која дипломирала на Катедрата за Општа и компаративна книжевност на Филолошкиот факултет и магистрирала на Културолошките студии на Институтот за македонска литература. По неколку објавени раскази, во 2013-та се појави нејзиниот прв роман „Пишувајќи ги изгубените топки“. Наредната 2014-та го објави „Вишнова хроника“ кој влезе во финале за „Роман на годината“ и веќе е преведен на бугарски и на украински јазик. Пармаковска е претставничка на новиот бран помлади македонски писатели и во февруари годинава стана член на Друштвото на писателите на Македонија.

Финалисти на наградата „Роман на годината 2017“ беа и романите „Апокалипса.мк“ на Бранко Прља, издание на „Готен“, и „Диссомнии“ на Игор Станојоски, издание на „Антолог“.

Романот е објавен од издавачката куќа „Или-Или“ и беше избран со мнозинство гласови на петчленото жири меѓу 27 романи кои беа во конкуренција за наградата. Таа се состои од статуетка, плакета и паричен износ од 150.000 денари. Покровител е Комерцијална банка а.д.

Извор: http://cooltura.mk/

Comments

comments