Промоција на романот „Анатомија на бумбарот“ од Стефан Марковски

Spread the love

Романот „Анатомија на бумбарот” на Стефан Марковски ќе биде промовиран на 23 декември, четврток, во 19:00 часот во Домот на култура „Кочо Рацин“ – Скопје.

Романот на Марковски беше објавен на англиски јазик и достапен во електронска и печатена верзија на платформата „Амазон” каде годинава достигна и рекордно прво место во категоријата Источноевропска литература за Киндл изданијата.

Во романот, чие македонско издание е објавено од „Паблишер“, се дефинира енергична и психолошки силна приказна каде се претопуваат елементи на гротеска, хумор и егзистенцијалистичко преиспитување. Во наративот, како што во поговорот пишува Александар Прокопиев, прогресира една примамлива, куриозитетна, откачена, убаво и сочно раскажана приказна раслоена во делови кои во себе носат и гнев и пркос, од една, и хумор и гротеска од друга страна.

Романот, како ретко кој во македонската литература, покренува внатрешна револуција во секој кој ќе го чита, наметнувајќи повеќе егзистенцијалистички прашања и преиспитување на животот во потрагата по сопственото место во него.

Раскажана од две перспективи – машка и женска, оваа приказна е фино испреплетена мозаична сложувалка во која на крајот ќе се состават сите делчиња.